Ադրբեջանից մարդասիրական օգնության երկրորդ խմբաքանակն ուղարկվել է Ուկրաինա

Ի պատասխան Ուկրաինայից ստացված դիմումների և այդ երկրի տարածքում կայուն էներգամատակարարումը վերականգնելու նպատակով, այդ երկիր է առաքվել Ադրբեջանից մարդասիրական օգնության երկրորդ խմբաքանակը՝ բաղկացած էներգետիկ սարքավորումներից։

«Ազերթաջ»-ի փոխանցմամբ՝ մարդասիրական օգնությունը ներառում է 45 տրանսֆորմատոր և 50 գեներատոր։ Մարդասիրական օգնության առաջին խմբաքանակն ուղարկվել է դեկտեմբերի 17-ին։ Այս անգամ ուղարկվել է 1 մլն 422 հազար մանաթի օգնություն: Ընդհանուր առմամբ, ուկրաինական ճգնաժամի հետ կապված Ադրբեջանն այդ երկրին հատկացրել է մոտ 30 մլն մանաթի մարդասիրական օգնություն։

Ուկրաինայի էներգետիկայի նախարար Գերման Գալուշչենկոն այս կապակցությամբ նշել է. «Ցանկանում եմ անձամբ շնորհակալություն հայտնել իմ գործընկերոջը՝ Ադրբեջանի էներգետիկայի նախարար Փարվիզ Շահբազովին արագ արձագանքման և արդյունավետ, ժամանակին աջակցության համար։ Մենք երախտապարտ ենք Ուկրաինայի ժողովրդի հետ ձեր համերաշխության համար»։