Ադրբեջանում Ֆրանսիայի դեսպանը կանչվել է ԱԳՆ

Ֆրանսիայի դեսպան Անն Բուայյոնը կանչվել է Ադրբեջանի ԱԳՆ։

Ինչպես հայտնում է Caliber.Az-ը՝ հղում անելով դիվանագիտական աղբյուրներին, դեսպանին խնդրել են պարզաբանել՝ Ֆրանսիայում նախագահ Էմանուել Մակրոնի և Դաշնակցության ու հայկական լոբբիի ներկայացուցիչների միջև վերջերս տեղի ունեցած հանդիպումը՝ և մամուլում հայտնված հայտարարությունների մասին՝ այս հանդիպմանը Ֆրանսիայի նախագահ կողմից արված որոշ կարծիքների վերաբերյալ։

Դեսպանի ուշադրությանն է ներկայացվել, որ ֆրանսիական կողմը պետք է պարզաբանի Մակրոնի անունից արված այս հայտարարությունները։ Այսպես, Դաշնակցության և հայկական լոբբիի ներկայացուցիչները լրատվամիջոցներում իրենց հայտարարություններում, հղում անելով Էմանուել Մակրոնին, մասնավորապես նշել են, որ Քիշնևի հանդիպումից անմիջապես հետո, Ֆրանսիայի նախագահը զանգահարել է նրանց և հայտարարել, որ ավելի ակտիվ է «Ղարաբաղի հարցում», քան Փաշինյանը, և էլ ավելի կուժեղացնի այդ ակտիվությունը։

Ի պատասխան՝ դեսպանն ասել է, որ տեղեկություն չունի այդ հարցի վերաբերյալ։