Անցյալ տարի ադրբեջանական բանակը 423 վարժանք է անցկացրել

2023 թվականի ընթացքում ադրբեջանական բանակն անցկացրել է 143 հատուկ տակտիկական, 261 մարտավարական, 8 մարտավարական թռիչքային, 7 նավա-մարտական, 4 հրամանատարաշտաբային զորահավաքային վարժանք, ինչպես նաև կոմանդոսների և դիպուկահարների պատրաստման դասընթացներ։

Ինչպես հաղորդում է Caliber.Az-ը, այս մասին հայտարարվել է ադրբեջանական բանակի Ուսումնավարժական կենտրոնում Ադրբեջանի ՊՆ ներկայացուցիչների և լրագրողների միջև անցկացված հանդիպմանը:

Միջոցառմանն ընդգծվել է, որ անցյալ տարի ադրբեջանցի զինվորականները մասնակցել են 21 միջազգային վարժանքների, որոնք անցկացվել են ինչպես երկրի ներսում, այնպես էլ այլ երկրներում։

2023 թվականի ընթացքում պաշտպանության նախարարությունը իր պաշտոնական կայքում և սոցիալական ցանցերի իր պաշտոնական էջերում հրապարակել է գերատեսչության միջոցառումների լուսաբանմանն առնչվող 955 նյութ, 4224 լուսանկար և 403 տեսանյութ։ Նյութերից 854-ը թարգմանվել է ռուսերեն և անգլերեն։

Վերջին մեկ տարվա ընթացքում բավարարվել է ադրբեջանական բանակի նյութատեխնիկական բազայի միջոցով նկարահանումներ իրականացնելու վերաբերյալ լրատվամիջոցների 186 հայց: Նկարահանումներին մասնակցել են 11 պետական կառույցներ, 160 տեղական լրատվամիջոց, 6 հասարակական միավորումներ, 9 պրոդյուսերական, ռադիո և արտասահմանյան մեդիա կենտրոններ։

Բացի այդ, կազմակերպվել է 26 մեդիա շրջայց զորամասեր՝ 171 մեդիա սուբյեկտի 347 ներկայացուցիչների մասնակցությամբ: Այստեղ տարբեր թեմաներով նկարահանումներ են կազմակերպվել, լրագրողները ծանոթացել են զինծառայողների ծառայության ու կենցաղային պայմաններին։