Արյունոտ հունվարը՝ Ռեզա Դեգատիի հիշողություններում. ես գաղտնի էի ժամանել Բաքու ԼՈՒՍԱՆԿԱՐ

Ֆրանսիացի հայտնի ֆոտոլրագրող, ծագումով ադրբեջանցի Ռեզա Դեգատին սոցիալական ցանցերում գրառում է կատարել 1990 թվականի հունվարի 19-ի լույս 20-ի գիշերը տեղի ունեցած արյունալի իրադարձությունների հետ կապված։

Անդրադառնալով Բաքվում խորհրդային զինվորների կողմից իրականացված ջարդերին՝ լուսանկարիչը կիսվել է այս ողբերգության մասին իր հիշողություններով: Նրա խոսքով, այն ժամանակ քաղաքը փակ էր լրագրողների համար, սակայն ինքը Մոսկվայից կարողացել է գնացքով գաղտնի հասնել Բաքու:

«Ես հստակ ապացույցներ ներկայացրեցի անկախության այս շարժման բռնի ճնշման մասին»,- գրել է նա, հայտնում է Caliber.Az-ը։

Ռեզա Դեգատին պատմել է նաև հունվարի 20-ի իրադարձությունների խորհրդանիշ դարձած մեխակի մասին:

«Տեղի ունեցածից հետո ծաղիկները սկսեցին ասոցացվել այդ արյունոտ գիշերվա հետ։ Կարմիր մեխակներն այժմ օգտագործվում են միայն հուղարկավորությունների ժամանակ և դրանք դնում են անկախության համար պայքարում զոհվածների շիրիմին»,- ասվում է հրապարակման մեջ։

Նա նաև ընդգծել է, որ այս իրադարձությունների մասին մանրամասն պատմել է «The Massacre of the Innocents» («Անմեղների նկատմամբ հաշվեհարդար») գրքում։