Դեսպան. Ադրբեջանը և ԵՄ-ն շարունակում են աշխատել նոր համաձայնագրի վրա

ԵՄ-ն ու Ադրբեջանը ամրապնդում են համագործակցությունը, աշխատանքները շարունակվում են նոր համաձայնագրի վրա:

Ինչպես հաղորդում է Caliber.Az-ը, այս մասին լրագրողների հետ հանդիպման ժամանակ հայտարարել է՝ Ադրբեջանում Եվրամիության (ԵՄ) ներկայցուցչության ղեկավար, դեսպան Պյոտր Միխալկոն։

«Մենք տեսնում ենք Ադրբեջանի հետ հարաբերությունների ամրապնդում։ Անցյալ տարի տեղի ունեցան մի շարք կարևոր այցեր։ Եվրոպական խորհրդի նախագահ Շառլ Միշելը, ԵՄ հանձնակատար Օլիվեր Վարհելին այցելել են Բաքու։ Դեկտեմբերին Ադրբեջանի նախագահ Իլհամ Ալիևը Բրյուսելում մասնակցել է Արևելյան գործընկերության գագաթնաժողովին։ Մենք շարունակում ենք աշխատել ԵՄ-ի և Ադրբեջանի միջև նոր համաձայնագրի վրա»,- ասել է ԵՄ դեսպանը։

Պ.Միխալկոն նշել է, որ Եվրամիությունը և Ադրբեջանը շարունակում են մնալ կարևոր առևտրային գործընկերներ։ Նրա խոսքով, Ադրբեջանի արտահանման 51%-ը ուղղվում է ԵՄ, և կողմերն այժմ հասել են նույն ապրանքաշրջանառությանը, ինչ մինչ համավարակը։