Իսլամաբադը Բաքվին առաջարկում է ամրապնդել ռազմական համագործակցությունը Հանդիպում Ադրբեջանի դեսպանատանը

Սեպտեմբերի 13-ին Իսլամաբադում Ադրբեջանի դեսպան Խազար Ֆարհադովը հանդիպել է՝ Պակիստանի ռազմաօդային ուժերի շտաբի պետ Զահիր Ահմեդ Բաբար Սիդհուի հետ։

Այս մասին հայտնում է Caliber.Az-ը՝ պակիստանյան The Nation թերթին հղումով։

Մամուլի հաղորդագրության համաձայն՝ հանդիպմանը քննարկվել են հարցերի լայն շրջանակ, այդ թվում՝ փոխադարձ հետաքրքրություն ներկայացնող հարցեր, տարածաշրջանում տեղի ունեցող զարգացումները և փոփոխվող աշխարհաքաղաքական լանդշաֆտը։

ՌՕՈՒ-ի շտաբի պետը վերահաստատել է իր վճռականությունն էլ ավելի ամրապնդելու երկու երկրների միջև առկա ռազմական համագործակցությունը, հատկապես կադրերի պատրաստման և ռազմական ավիացիայի ոլորտներում։ ՌՕՈՒ-ի առաջատար փորձի կենտրոնում կայանալիք առաջիկա խոշոր զորավարժությունների հետ կապված՝ շտաբի պետն ընդգծել է համապատասխան ռազմաօդային ուժերի համատեղ օդային զորավարժությունների առանցքային դերը՝ փոխադարձ ուսուցման զարգացման և անվտանգության ընդհանուր խնդիրների արդյունավետ լուծման համար:

Նա լիակատար աջակցություն է առաջարկել՝ Ադրբեջանի ռազմաօդային ուժերի ավիացիայի և ցամաքային անձնակազմի մարտավարական պատրաստության համապարփակ ուսուցման ծրագրերի իրականացմանը, նրանց տեխնիկական հմտությունները ամրապնդելու և երկու ռազմաօդային ուժերի միջև ավելի մեծ օպերատիվ համատեղելիություն ապահովելու նպատակով։