Իտալիայի քաղաքականությունը միշտ հավասարակշռված է, Ֆրանսիայինը՝ կործանարար և անարդյունավետ Ադրբեջանի ԱԳՆ հայտարարությունը

Ապրիլի 3-ին Իտալիայի արտաքին գործերի և միջազգային համագործակցության նախարարությունը հայտարարություն է տարածել, որում ասվում է, որ երրորդ կողմերի միջամտությունը Ադրբեջանի և Հայաստանի միջև խաղաղ գործընթացին կարող է լրացուցիչ լարվածություն առաջացնել։ Հայտարարությունում ֆրանսիական կողմին կոչ է արվում զերծ մնալ խաղաղության ջանքերին խոչընդոտող քայլերից։ Փաստաթղթում նշվում է նաև, որ Ադրբեջանը պատասխանատու մոտեցում է ցուցաբերում որպես ՄԱԿ-ի Կլիմայի փոփոխության մասին շրջանակային կոնվենցիայի Կողմերի 29-րդ նստաշրջանն (COP29) ընդունող երկիր, հետևաբար նաև Ֆրանսիայի արտգործնախարարի պնդումները ԱՄՆ պետքարտուղարի հետ համատեղ մամուլի ասուլիսում բացասաբար են ազդել գործընթացի վրա:

Ինչպես հաղորդում է Caliber.Az-ը, մեկնաբանելով դա, Ադրբեջանի ԱԳՆ մամուլի քարտուղար Այխան Հաջիզադեն ասել է, որ Իտալիայի արտաքին գործերի և միջազգային համագործակցության փոխնախարարի այս հայտարարությունը խոսում է, առաջին հերթին, միջազգային իրավունքի հիմնարար սկզբունքների ու նորմերի հանդեպ հարգանքի մասին:

«Դա նաև ցույց է տալիս, թե որքան կարևոր է զերծ մնալ երկրների ներքին գործերին միջամտելուց և անպատասխանատու մոտեցում ցուցաբերելուց այնպիսի զգայուն հարցի նկատմամբ, ինչպիսին է Ադրբեջանի և Հայաստանի միջև հարաբերությունների կարգավորման և խաղաղության գործընթացը։

Իտալական կողմի մոտեցումը տարածաշրջանային խնդրին թե՛ հակամարտության, թե՛ հետկոնֆլիկտային շրջանում միշտ հավասարակշռված է եղել։ Իտալիան միշտ խուսափել է միջազգային իրավունքի խախտումներն անտեսելու քաղաքականությունից, և սա ևս մեկ անգամ ցույց է տալիս, թե որքան անհիմն և անարդյունավետ են Ֆրանսիայի նման երկրների ապակառուցողական քաղաքականությունը։ Մենք կարծում ենք, որ Իտալիայի վարած քաղաքականությունը պետք է օրինակ ծառայի որոշ եվրոպական պետությունների, հատկապես Ֆրանսիայի համար»,- ասել է Հաջիզադեն։