Լեյլա Աբդուլլաևա. Ադրբեջանը խաղաղ դիրքորոշում է ցուցաբերում բոլոր երկրների, այդ թվում՝ Հայաստանի նկատմամբ

Ֆրանսիայում Ադրբեջանի դեսպան Լեյլա Աբդուլլաևան հարցազրույց է տվել ֆրանսիական Radio J ռադիոկայանին։

Ըստ «Ազերթաջ»-ի՝ Լեյլա Աբդուլլաևան պատասխանել է Իսրայելի նախագահ Իցհակ Հերցոգի՝ Բաքու կատարած պաշտոնական այցի վերաբերյալ հարցերին։ Հարցազրույցում շոշափվել են տարածաշրջանի իրողությունները։ Նշվել է, որ Ադրբեջանը և Իսրայելը ռազմավարական համագործակցություն են հաստատել այնպիսի ոլորտներում, ինչպիսիք են տնտեսությունը, էներգետիկան, կրթությունը, բարձր տեխնոլոգիաները, կիբեռանվտանգությունը և հումանիտար ոլորտները։

Դիվանագետը նշել է, որ Ադրբեջանի Դեմոկրատական Հանրապետությունը դարձել է մուսուլմանական Արևելքի առաջին խորհրդարանական հանրապետությունը։ Լեյլա Աբդուլլաևան խոսել է Ադրբեջանի դեմ Հայաստանի ռազմական ագրեսիայի մասին, թե ինչպես էր Ադրբեջանը փորձում հակամարտությունը լուծել բանակցությունների միջոցով, սակայն հայկական կողմի սադրանքները պատերազմն անխուսափելի դարձրին։ Լեյլա Աբդուլլաևան ընդգծել է, որ հայկական օկուպացիայի տակ գտնվող տարածքներն ազատագրած Ադրբեջանն այսօր էլ խաղաղ դիրքորոշում է բռնում բոլոր երկրների, այդ թվում՝ նաև Հայաստանի նկատմամբ: