Հաջիև. Բաքուն այլընտրանքային տրանսպորտային երթուղիներ կմշակի՝ եթե Երևանը հրաժարվի պարտավորություններից

Եթե Հայաստանը հրաժարվի իր պարտավորություններից, ապա Ադրբեջանն այլ երկրների հետ նոր այլընտրանքային տրանսպորտային երթուղիներ կմշակի։

Այս մասին ՏԱՍՍ-ին տված հարցազրույցում ասել է Ադրբեջանի նախագահի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևը։

«Եթե Հայաստանը տարբեր պատրվակներով հրաժարվում է իր պարտավորություններից և ցանկանում է շարունակել մնալ մեկուսացման մեջ, ապա Բաքուն մտադիր չէ սպասել և արդեն ակտիվորեն աշխատում է այլընտրանքային նախագծերի վրա տարածաշրջանի այլ երկրների հետ։ Մենք մեր լոգիստիկ կարիքները չենք կապելու ՀՀ կառավարության քմահաճույքի հետ և առաջ ենք շարժվելու մեր տարածաշրջանային գործընկերների հետ»,- նշել է նա։

Նախագահի օգնականն ընդգծել է, որ Ադրբեջանը հետևողականորեն հանդես է գալիս տարածաշրջանում բոլոր տրանսպորտային հաղորդակցությունների բացման օգտին, քանի որ կարծում է, որ սերտ առևտրատնտեսական կապերը կնպաստեն տարածաշրջանի խաղաղությանը, կայունությանը և բարգավաճմանը. «Այս համատեքստում մենք բարձր ենք գնահատում Ռուսաստանի Դաշնության դիրքորոշումը, որը մեծ ջանքեր է գործադրում այս ուղղությամբ առաջընթաց գրանցելու համար»։