ՄԱԿ-ի ներկայացուցիչ. Ադրբեջանը սելեկտիվ աբորտների թվով առաջատարն է աշխարհի երկրների շարքում

Ադրբեջանն աշխարհում առաջատարն է սելեկտիվ աբորտների քանակով, ինչը ապագայում որոշակի խնդիրներ է խոստանում հասարակությանը։

Ինչպես հաղորդում է Caliber.Az-ը, այս մասին հայտարարել է Ադրբեջանում ՄԱԿ-ի Բնակչության հիմնադրամի գրասենյակի ղեկավար Ֆարիդ Բաբաևը Միլլի Մեջլիսում «Կանանց և երեխաների իրավունքների օրենսդրության կատարելագործում. ներկա իրավիճակը և նոր մարտահրավերներ» թեմայով հանրային լսումների ժամանակ։

Բաբաևը հիշեցրել է, որ Ադրբեջանը սելեկտիվ աբորտների քանակով առաջ է անցել Չինաստանից, որն այս ցուցանիշով երկար տարիներ առաջատար է եղել։

ՄԱԿ-ի ներկայացուցչի խոսքով՝ եթե այդ բացասական միտումը չփոխվի, ապա 2050 թվականին երկիրը որոշակի խնդիրների առաջ կկանգնի։

«Դրա համար անհրաժեշտ է լուսավորչական աշխատանք տանել և տարբեր միջոցառումներ կազմակերպել այս ուղղությամբ։ Նաև օրենսդրության մեջ որոշակի փոփոխություններ կատարելու անհրաժեշտություն կա»,- ասել է նա։