Յալչըն Ռաֆիևը՝ COP29-ում Ադրբեջանի ֆինանսական նախաձեռնությունների մասին

Հստակեցվում է հանքարդյունաբերական ընկերությունների մասնաբաժինը, որոնք կներառվեն COP29-ի նախօրեին Ադրբեջանի կողմից նախաձեռնված՝ Climate Finance Action Fund-ում (CFAF):

Այս մասին Caliber.Az-ին հայտնել է Ադրբեջանի փոխարտգործնախարար, COP29-ի գլխավոր բանակցող Յալչըն Ռաֆիևը։

«Մենք բանակցություններ ենք սկսել՝ Ադրբեջանի և ամբողջ աշխարհի հանածո վառելիքի ընկերությունների հետ՝ CFAF-ին կամավոր ներդրումներ կատարելու վերաբերյալ: Մասնավորապես, արդեն տարվում են մանրամասն բանակցություններ՝ SOCAR-ի և նավթի, գազի ու ածխի արդյունահանման ոլորտում գործող մասնավոր ընկերությունների հետ։ Ընկերությունների մասնաբաժինները դեռ որոշված չեն, և իրավիճակը ավելի պարզ կդառնա կլիմայական գագաթնաժողովին մոտ ժամանակում»,- նշել է Ռաֆիևը։

Նրա խոսքով, քննարկումներ են տարվում, թե դրանք ընկերություններից միանվագ գումարներ կլինեն, թե ընկերության եկամուտներից պահումներ։

Այս հարցի շուրջ COP29-ի նախագահությունը բանակցություններ է վարում արաբական, եվրոպական և ասիական ընկերությունների հետ, և, Ռաֆիևի խոսքով՝ 10 երկրների ընկերություններ արդեն համաձայնել են դառնալ CFAF-ի հովանավորները:

Նշենք, որ Ադրբեջանի այս նախաձեռնությունը ներկայացվել է հուլիսի 19-ին Բաքվում՝ COP29-ի նախագահության Գործողությունների ծրագրի շնորհանդեսի ժամանակ։