«Ոչ ոք չի կարող ճնշում գործադրել Ադրբեջանի վրա» Միլլի Մեջլիսը դատապարտել է Եվրախորհրդարանի տարեկան զեկույցը

Ադրբեջանի Հանրապետության Միլլի Մեջլիսը խստորեն դատապարտում և բողոքում է միջազգային իրավունքի և արդարության տեսակետից կանխակալ, միակողմանի կարծիքների դեմ, որոնք արտացոլված են փետրվարի 28-ին Եվրախորհրդարանի կողմից ընդունված տարեկան զեկույցում:

Ինչպես հաղորդում է Caliber.Az-ը, այս մասին ասված է Միլլի Մեջլիսի հայտարարության մեջ։

«Այդ բանաձևը, որն ընդունվել է այն ժամանակ, երբ Գերմանիայում ընթանում են խաղաղ բանակցություններ, և առաջ քաշված անհեթեթ պնդումները լուրջ հարցադրումներ են առաջացնում՝ իսկապե՞ս Եվրոպան շահագրգռված է Հարավային Կովկասում խաղաղության հաստատմամբ։ Եվրոպացի պատգամավորների համար, որոնք կոչ են անում դիմել վճռական քայլերի և պատժամիջոցների կիրառել Ադրբեջանի դեմ, Ադրբեջանի ինքնիշխանությունն ու տարածքային ամբողջականությունը պակա՞ս կարևոր են, քան Հայաստանի ինքնիշխանությունն ու տարածքային ամբողջականությունը»,- ասվում է փաստաթղթում։

Ընդգծվում է, որ Հայաստանին զինելու անհրաժեշտության մասին զեկույցում տեղ գտած կարծիքները հստակ արտացոլում են տարածաշրջանում իրավիճակը սրելու և խաղաղ գործընթացին խոչընդոտելու մտադրությունը։