Պահանջում ենք ստիպել Հայաստանին իրականացնել Զանգեզուրի միջանցքի նախագիծը Նախչըվանի ԻՀ ՈԿԿ-ները դիմել են աշխարհին

Ադրբեջանի Նախչըվանի Ինքնավար Հանրապետությունում գործող ոչ կառավարական կազմակերպությունները դիմել են համաշխարհային հանրությանը։

Ինչպես հայտնում է Caliber.Az-ը, ուղերձում ասվում է, որ Նախչըվանի Ինքնավար Հանրապետությունն ավելի քան 30 տարի ապրում է շրջափակման պայմաններում:

«Շրջափակման պատճառով Նախչըվանի բնակչությունը գրեթե 15 տարի ապրել է առանց գազի և նույնիսկ առանց էլեկտրականության։ Ադրբեջանի հիմնական մասից սկիզբ առնող էլեկտրահաղորդման գծերը վնասվել են Հայաստանի կողմից: Նախչըվանի և Բաքվի միջև հաղորդակցությունն իրականացվել է երկաթուղով և ընդհատվել 1992 թվականին՝ վերջին գնացքի Մեղրիից գնդակոծումից հետո։ Միջազգային հանրությունը ոչ մի միջոց չի ձեռնարկել Նախչըվանի խաղաղ բնակիչների խնդիրները լուծելու, ինչպես նաև շրջափակումը վերացնելու համար, որևէ ճնշում չի գործադրել Հայաստանի վրա այս հարցում։ Ինչո՞ւ մեր ձայնը մինչ օրս ոչ ոք չի լսել։

Հայաստանը անընդհատ գնդակոծում է Նախչըվանի բնակչությանն ու բնակավայրերը։ Եթե չլինեին ադրբեջանական ժողովրդի համազգային առաջնորդ Հեյդար Ալիևը և նրա արժանի հետևորդ նախագահ Իլհամ Ալիևը, Նախչըվանը օկուպացված կլիներ, ինչպես Ղարաբաղը։

Մենք հաճախ ենք տեսնում, թե ինչպես է Կարմիր Խաչի միջազգային կոմիտեն մարդասիրական հիմունքներով փոխադրումներ իրականացնում Լաչինի ճանապարհով։ Մենք նաև կոչ ենք անում Կարմիր Խաչի միջազգային կոմիտեին ապահովել կապը Նախչըվանի Ինքնավար Հանրապետության և Ադրբեջանի հիմնական մասի միջև»,- ասվում է հայտարարության մեջ։