Ջեյհուն Բայրամով. Հայաստանը հարաբերությունները կարգավորելու համար քաղաքական կամք չի ցուցաբերում ԼՈՒՍԱՆԿԱՐ

Սեպտեմբերի 6-ին Ադրբեջանի ԱԳ նախարար Ջեյհուն Բայրամովը Խորվաթիա կատարած պաշտոնական այցի շրջանակներում հանդիպել է՝ Խորվաթիայի արտաքին գործերի և եվրոպական հարցերի նախարար Գորդան Գրլիչ-Ռադմանի հետ։

Ինչպես Caliber.Az-ին հայտնել են ԱԳՆ-ից, նախարարները սկզբում անցկացրել են անհատական հանդիպում, ապա ընդլայնված կազմով՝ պատվիրակությունների մասնակցությամբ։

Կողմերը մտքեր են փոխանակել՝ երկկողմ և միջազգային համագործակցության մի շարք հարցերի շուրջ, նշել են տնտեսական, էներգետիկ, գյուղատնտեսական, հումանիտար, զբոսաշրջության ոլորտներում կապերի հետագա զարգացումը, ականազերծման ոլորտում, ինչպես նաև համագործակցության ուղղությունների դիվերսիֆիկացման անհրաժեշտությունը։ Ընդգծվել է, որ խորվաթական տարանցիկ օպերատորների և լոգիստիկ ընկերությունների համար Միջին միջանցքից օգտվելու մեծ հնարավորություններ կան։

Ջեյհուն Բայրամովը զրուցակիցներին տեղեկացրել է՝ հետհակամարտային շրջանում տարածաշրջանում տիրող իրավիճակի և իրողությունների մասին, այդ թվում՝ Ադրբեջանի և Հայաստանի միջև հարաբերությունների կարգավորման գործընթացում և պահպանվող ականային սպառնալիքի մասին։ Նա հայտարարել է, որ չնայած Ադրբեջանի նախաձեռնություններին, Հայաստանը՝ հարաբերությունների կարգավորման իրական քայլերի համար անհրաժեշտ քաղաքական կամք չի ցուցաբերում, շարունակում է հակասական դիրքորոշում գրավել, մշտապես խուսափում է ձեռք բերված պայմանավորվածությունների ու պարտավորությունների կատարումից, դիմում է քաղաքական և ռազմական սադրանքների, դեռևս ամբողջությամբ դուրս չի բերել իր զինված ուժերը Ադրբեջանի տարածքներից, ինչը վտանգ է ներկայացնում տարածաշրջանային անվտանգության համար։

Նշվել է, որ Լաչին-Խանքենդի ճանապարհի հետ կապված պնդումները հիմք չունեն։ Ընդգծվել է, որ տարածք ապրանքներ տեղափոխելու և ճանապարհների զուգահեռ օգտագործման վերաբերյալ Ադրբեջանի առաջարկների մերժումը վկայում է, որ «մարդասիրական իրավիճակի» մասին հայտարարությունները քաղաքական շահարկում են։