Բաքուն և Անկարան քննարկել են համատեղ զորավարժությունների ինտենսիվացման անհրաժեշտությունը

Շարունակվում է թուրքական պատվիրակության պաշտոնական այցը Ադրբեջան, որը գլխավորում է Թուրքիայի Զինված ուժերի գլխավոր շտաբի երկրորդ պետ, բանակի գեներալ Լևենթ Էրգյունը։

Այս մասին Caliber.Az-ին հայտնել են Ադրբեջանի պաշտպանության նախարարությունից։

Դեկտեմբերի 18-ին Ադրբեջանի պաշտպանության նախարարի առաջին տեղակալ, ԶՈՒ Գլխավոր շտաբի պետ, գեներալ-գնդապետ Քերիմ Վելիևը հանդիպել է թուրքական պատվիրակության հետ։

Հանդիպմանը Վելիևը նշել է, որ Ադրբեջանի և Թուրքիայի միջև ռազմավարական գործընկերությունը շարունակում է զարգանալ։ Ընդգծվել է զինծառայողների գիտելիքների և հմտությունների կատարելագործման նպատակով անցկացվող համատեղ զորավարժությունների ինտենսիվությունը մեծացնելու անհրաժեշտությունը։

Լևենթ Էրգյունը, իր հերթին, նշել է Բաքվում երկու օր շարունակ ընթացող Ադրբեջանա-թուրքական բարձր մակարդակի ռազմական երկխոսության 17-րդ նիստի շրջանակներում անցկացված միջոցառումների օգտակար ազդեցությունը նոր կարողությունների ձևավորման վրա՝ միաժամանակ ընդգծելով փոխայցելությունների կարևորությունը ռազմական համագործակցության հետագա ընդլայնման առումով։

Հանդիպման ընթացքում վերլուծվել է ադրբեջանա-թուրքական ռազմական համագործակցության ներկայիս վիճակը, լայնածավալ քննարկումներ են անցկացվել փոխադարձ հետաքրքրություն ներկայացնող հարցերի և ապագա ծրագրերի վերաբերյալ։