Էրդողանը՝ Եվրոպայի էներգետիկ անվտանգության գործում Թուրքիայի և Ադրբեջանի դերի մասին

Թուրքիայի նախագահ Ռեջեփ Թայիբ Էրդողանը ուղերձ է հղել՝ Բաքվի էներգետիկ շաբաթվա մասնակիցներին։
 
Ինչպես հաղորդում է Caliber.Az-ը՝ հղում անելով թուրքական լրատվամիջոցներին, Էրդողանը ընդգծել է, որ Թուրքիան և Ադրբեջանը ռազմավարական նշանակություն ունեն՝ Եվրոպայի էներգետիկ անվտանգության տեսանկյունից։
 
Թուրքիայի առաջնորդի ուղերձը ընթերցել է՝ Թուրքիայի էներգետիկայի և բնական պաշարների նախարար Ալփարսլան Բայրաքթարը։
 
Էրդողանը ընդգծել է, որ Ադրբեջանի և Թուրքիայի միջև հարաբերությունները շարունակում են հաջողությամբ զարգանալ, այդ թվում՝ էներգետիկ ոլորտում։ Նա նշել է, որ երկու եղբայրական երկրները զգալի հաջողությունների են հասել այս ոլորտում՝ իրականացնելով խոշորածավալ նախագծեր, ինչպիսիք են Բաքու-Թբիլիսի-Ջեյհան նավթատարը, Բաքու-Թբիլիսի-Էրզրում գազատարը և Անդրանատոլիական գազատարը (TANAP):
 
«Մեր համագործակցությունը ոչ միայն օգուտ է բերում Թուրքիային և Ադրբեջանին, այլև շարունակում է զգալի ներդրում ունենալ տարածաշրջանի և Եվրոպայի էներգետիկ անվտանգության գործում։ Վերջին տարիների գլոբալ աշխարհաքաղաքական իրադարձությունները կրկին ապացուցեցին՝ թուրք-ադրբեջանական գործընկերության ռազմավարական կարևորությունը», - ընդգծեց Էրդողանը։
 
Թուրքիայի առաջնորդը հիշեցրել է, որ այս տարվա մարտին շահագործման հանձնվեց Իգդիր-Նախչըվան գազատարը, որը դարձավ երկու երկրների միջև երկարաժամկետ էներգետիկ համագործակցության նորագույն օրինակը։ Այս նախագիծը ամրապնդեց Նախչըվանի Ինքնավար Հանրապետության էներգետիկ անվտանգությունը և ավելի ուժեղ դարձրեց Թուրքիան ու Ադրբեջանը։