Փոխնախարար. Ադրբեջանում ՎԷԱ-ի զարգացումը կախված է երկու գործոնից

Ադրբեջանում վերականգնվող էներգիայի աղբյուրների (ՎԷԱ) ինտեգրման տեմպը և դրանց հետ կապված ներդրումների ծավալը որոշվում են երկու հիմնական գործոններով՝ համակարգային մարտահրավերներով և նախագծի իրականացման ամբողջական արժեքով։
 
Ինչպես հաղորդում է Report-ը, այս մասին հայտարարել է Ադրբեջանի էներգետիկայի փոխնախարար Էլնուր Սոլթանովը՝ Լոնդոնում Վերակառուցման և զարգացման եվրոպական բանկի (ՎԶԵԲ) տարեկան  նիստի շրջանակներում՝ «Ադրբեջան. «կանաչ» աճի և կապվածության  ձևավորվող դարպաս» թեմայով քննարկման ժամանակ:
 
Սոլթանովի խոսքով, առաջին գործոնը կապված է՝ ազգային էներգետիկ համակարգի առանձնահատկությունների և վերականգնվող էներգիայի աղբյուրների փոփոխականության հետևանքով առաջացած մարտահրավերների հետ.
 
«Վերականգնվող էներգիայի աղբյուրների խնդիրը դրանց ընդհատվող բնույթն է։ Արևը միշտ չէ, որ շողում է, քամին անկանխատեսելի է։ Որպեսզի նման անկայուն արտադրությունը չխաթարի համակարգի կայունությունը, այն պետք է փոխհատուցվի՝ կամ էներգետիկ համակարգի մասշտաբով, կամ հարևան երկրների հետ բարձր կապի միջոցով»։
 
Նա նշել է, որ առաջին դեպքում Ադրբեջանն ունի սահմանափակ հնարավորություններ. տեղադրված հզորությունը կազմում է մոտ 8 ԳՎտ, մինչդեռ միջին սպառումը կազմում է ընդամենը 3 ԳՎտ, ինչը համակարգը խոցելի է դարձնում արտադրության տատանումների նկատմամբ։
 
Երկրորդ փոխհատուցող մեխանիզմը, ըստ փոխնախարարի, կարող է լինել արտաքին կապակցվածությունը.
 
«Եվրոպական երկրները օգտվում են իրենց չափսերից և ինտեգրումից։ Օրինակ՝ Իսպանիան, չնայած իր չափսերին, դժվարանում է Ֆրանսիայի հետ թույլ ցանցային կապերի պատճառով։ Ադրբեջանի համար կապը միայն էլեկտրաէներգիայի առևտրի հարց չէ։ Սա ամբողջ էներգետիկ համակարգի կայունության գործոն է, հատկապես հաշվի առնելով երկրի հեռավորությունը խոշոր շուկաներից և տեխնոլոգիական կենտրոններից»։