Չինաստանը բեռնափոխադրումների նոր գծի շրջանակներում առաջին գնացքն է ուղարկել Եվրոպա՝ Ադրբեջանի տարածքով

Ադրբեջանի տարածքով դեպի Եվրոպա բեռնափոխադրման նոր գծի շրջանակներում՝ Չինաստանն ուղարկել է առաջին գնացքը, որը բաղկացած է ավտոպահեստամասերով և մեխանիկական սարքավորումներով բեռնված 104 ստանդարտ կոնտեյներներից՝ 15 միլիոն յուան  ընդհանուր  արժողությամբ (մոտավորապես 2,093 միլիոն ԱՄՆ դոլար):
 
Ինչպես հաղորդում է Report-ը՝ հղում անելով Չինաստանի պետական ​​երկաթուղային կորպորացիայի (ՉՊԵԿ) Պեկինի մասնաճյուղին, գնացքը երեկ մեկնել է Պեկինի Ֆանշան շրջանի կայարանից և Սինցզյան-Ույղուրական ինքնավար մարզի Հորգոս անցակետով կշարժվի դեպի Կասպից ծովի Ակտաու նավահանգիստ (Ղազախստան): Այնուհետև բեռը ծովով կհասցվի Ալյաթ նավահանգիստ, իսկ հետո՝ երկաթուղով՝ Բաքու։
 
Երթուղին իրականացվում է «երկաթուղի - ծով - երկաթուղի» մուլտիմոդալ սխեմայի համաձայն։ Երթուղու ընդհանուր երկարությունը գերազանցում է 8000 կմ-ը, իսկ մատակարարման ժամկետը կկազմի մոտավորապես 15 օր։ Բաքու հասնելուց հետո կոնտեյներների մի մասը կուղարկվի Վրաստան, Թուրքիա, Սերբիա և տարածաշրջանի այլ երկրներ։
 
«Ֆանշան» միջազգային ցամաքային նավահանգստի կառավարման ընկերության գլխավոր տնօրեն Վան Չուանմենի խոսքով, երթուղին Անդրկասպյան միջազգային տրանսպորտային երթուղու (TITR, Միջին միջանցք) մասն է կազմում, որը Չինաստան-Եվրոպա համաշխարհային տրանսպորտային ցանցի հարավային ճյուղն է։
 
«Մուլտիմոդալ սկզբունքի կիրառումը թույլ է տալիս զգալիորեն կրճատել առաքման ժամանակը ավանդական ծովային լոգիստիկայի համեմատ և ընդլայնել մեր աշխարհագրական ծածկույթը՝ ներառյալ Կասպիի տարածաշրջանի, Սև ծովի և Միջերկրական ծովի ավազանների, ինչպես նաև Կենտրոնական, Արևելյան և Արևմտյան Եվրոպայի երկրները», - ընդգծել է նա։