Forbes. Ադրբեջանը վերադառնում է «աշխարհի գինեգործության քարտեզին»

Forbes և Decanter ամսագրերը հրապարակել են հոդվածներ, որոնք նվիրված են՝ Ադրբեջանում գինեգործական գործունեության և մշակույթի վերածննդին  ու զարգացմանը։
 
Ինչպես հաղորդում է Report-ը, «Ադրբեջանը ձգտում է առանձնացնել իր գինիները» հոդվածում ընդգծվում է երկրի աճող ցանկությունը՝ արժանի տեղ զբաղեցնելու համաշխարհային գինեգործության ասպարեզում՝ կենտրոնանալով հիմնականում որակի, այլ ոչ թե քանակի վրա։
 
Հոդվածի հեղինակը նշում է, որ Խորհրդային Միության փլուզումից հետո, Ադրբեջանում գինեգործության նկատմամբ հետաքրքրությունը որոշ ժամանակով մարեց։ Սակայն մի քանի տարի անց երկիրը նոր էներգիայով և հավակնություններով վերադարձավ այս ոլորտի զարգացմանը։
 
«Մոտ 2000 թվականից ի վեր Ադրբեջանում գինեգործությունը սկսեց ակտիվորեն վերածնվել՝ հիմնական շեշտը դնելով ոչ թե արտադրության ծավալների, այլ արտադրանքի որակի վրա։ Մինչև 2017 թվականը տարեկան տնկվում էր մինչև 2000 հեկտար նոր խաղողի այգիներ, իսկ 2018 թվականին հիմնադրվեց Բաքվի գինու դպրոցը՝ պրոֆեսիոնալ սոմելյեներ պատրաստելու համար», - ասվում է Forbes-ի հոդվածում։