ԱՄՆ պետքարտուղարի օգնականը ժամանել է Ադրբեջան

ԱՄՆ պետքարտուղարի միջազգային կազմակերպությունների գծով օգնական Միշել Սիսոնը ժամանել է Ադրբեջան։

Ինչպես հայտնում է Сaliber.Az-ը, տեղեկությունը տարածել է ԱՄՆ դեսպանատունը։

Նշվում է, որ Բաքվում ԱՄՆ դեսպանատունը ուրախ է ողջունել ԱՄՆ պետքարտուղարի օգնական Միշել Սիսոնին, ով գտնվում է Ադրբեջանում և ծրագրում է հանդիպումներ անցկացնել պետական պաշտոնյաների հետ՝ քննարկելու հավաքական գլոբալ խնդիրների լուծման հարցում ԱՄՆ հանձնառությունը։

Հաղորդվում է, որ Ադրբեջանում գտնվելու ժամանակ ԱՄՆ պետքարտուղարի օգնականը կդիտարկի գործունեությունը ներկա և հնարավոր բազմակողմ համագործակցության ոլորտներում: Սա ներառում է այնպիսի հարցեր, ինչպիսիք են Կայուն զարգացման նպատակներին հասնելու համատեքստը և կլիմայի փոփոխությունը, պարենային անվտանգությունը, առողջապահության ոլորտում գլոբալ անվտանգությունը, անդրազգային մարտահրավերների լուծումը:

Ընդգծվում է, որ պետքարտուղարի օգնականը քարոզարշավ է իրականացնելու նաև Էմի Փոուփի աջակցության համար, ով ԱՄՆ-ի կողմից առաջադրվել է Միգրացիայի հարցերով միջազգային կազմակերպության գլխավոր տնօրենի պաշտոնում։