Հայաստանը դիտարկում է Հնդկաստանից ԶՀՀ և կամիկաձե ԱԹՍ գնելու հնարավորությունը

Ադրբեջանի հետ լարվածության պայմաններում Հայաստանը դիտարկում է՝ Հնդկաստանի հետ պաշտպանական նոր համաձայնագրեր կնքելու հնարավորությունը։

Այս մասին հաղորդում է «Արմենպրես»-ը՝ հղում անելով հնդկական ThePrint առցանց թերթին:

«Հայաստանի պաշտպանության նախարար Սուրեն Պապիկյանի և նրա գործընկեր՝ Հնդկաստանի պաշտպանության նախարար Շրի Ռաջնաթ Սինգհի երկկողմ հանդիպման ժամանակ, որը տեղի է ունեցել հոկտեմբերի 18-ին Գանդինագարում, DEFEXPO 2022-ի շրջանակներում, հիմնական ուշադրությունը դարձվել է պաշտպանության ոլորտում համագործակցության խորացմանը։ Հանդիպումը տեղի է ունեցել ընդամենը մի քանի շաբաթ անց այն բանից հետո, երբ երկու երկրները ստորագրել են միջկառավարական համաձայնագիր՝ Հնդկաստանից Pinaka համազարկային կրակի հրթիռային համակարգերի, Konkurs հակատանկային հրթիռային համակարգերի, 80 մմ ականանետների, ինչպես նաև այլ զինատեսակների գնման վերաբերյալ։

Հնդկաստանի կառավարության աղբյուրները լռում են հայ նախարարի հետ հանդիպմանը տեղի ունեցածի մասին, սակայն հաստատում են, որ «հիմնական ուշադրությունը դարձվել է պաշտպանական ոլորտում համագործակցության վրա»։
Հաստանը դիտարկում է տեղական Tata Advanced Systems Limited (TASL) և Solar Industries մասնավոր ընկերությունների կողմից Հնդկաստանում մշակված՝ «Ակաշ» զենիթահրթիռային համակարգերի և կամիկաձե անօդաչու թռչող սարքերի (loitering munition) ձեռքբերման հնարավորությունը»,- ասվում է հաղորդարույունում։