Հնդկաստանը ցանկանում է Հայաստանին զենք-զինամթերքի նոր խմբաքանակ մատակարարել

Հնդկաստանն ուսումնասիրում է Հայաստանին զենք-զինամթերքի նոր խմբաքանակ մատակարարելու հնարավորությունը։

Ինչպես հաղորդում է Caliber.Az-ը, այս մասին հայտնում է The Economic Times թերթը՝ վկայակոչելով աղբյուրներին։

Հայաստանի բարձրաստիճան ներկայացուցիչը Նյու Դելիում բանակցություններ է վարել զենքի մատակարարումների շուրջ, որոնք կիրականացվեն՝ երկու երկրների կողմից 2022 թվականի սեպտեմբերին ստորագրված պայմանագրերի հիման վրա, նշում է հրատարակությունը։

Պայմանագրերի արժեքը կազմում է 20 միլիարդ ռուփի (244,7 միլիոն դոլար): Դրանց համաձայն՝ Հնդկաստանը նախկինում Հայաստանին մատակարարել է սեփական դիզայնի «Պինակա» համազարկային կրակի հրթիռային համակարգեր (MLRS), որոնք առաջին անգամ վաճառվել են արտասահմանում, ինչպես նաև հակատանկային հրթիռներ և զինամթերքի խմբաքանակ։ Զենքը մատակարարվում էր Իրանի տարածքով տրանսպորտային միջանցքով։