Սաֆարլիի մայրը. Իրանում Ֆարիդին ձերբակալելու որևէ պատճառ չկա

Իրանում ձերբակալված Ադրբեջանի քաղաքացի Ֆարիդ Սաֆարլիի համար փաստաբան է վարձվել։

Ֆարիդ Սաֆարլիի մայրը՝ Դիլյարա Ասկերովան, Trend-ին ասել է, որ Իրանում բնակվող ադրբեջանցի փաստաբան են վարձել։

«Փաստաբանն արդեն ծանոթացել է գործին, հանդիպել Ֆարիդի և դատավորի հետ։ Փաստաբանը նշել է, որ Ֆարիդի ձերբակալման համար որևէ հիմք չկա»,- ասել է նա։

Ասկերովան հավելել է, որ երեկ հեռախոսով խոսել է որդու հետ.

«Ֆարիդն ասաց, որ առողջական խնդիրներ ունի և աղիների վիրահատություն է տարել: Ներկայում նրա վիճակը լավ է, բայց նա շատ անհանգստացած է կատարվածով։ Ֆարիդի գործով վճիռ պետք է կայացվի մոտ օրերս։ Փաստաբանի խոսքով՝ ըստ Իրանի օրենքների, դատավորը կարող է վճիռ կայացնել առանց Ֆարիդի ներկայության և առանց վերջին խոսքն ասելու»։