Տոկաև. Միջին միջանցքը ապահովում է Ասիայի և Եվրոպայի միջև մատակարարումների անվտանգությունը

Կասիմ-Ժոմարտ Տոկաևը մասնակցել է Բոաոյի ասիական ֆորումի (BFA) լիագումար նիստի բացման արարողությանը, որն ամեն տարի անցկացվում է Չինաստանի Հայնան նահանգում։ Այս տարի 23-րդ ֆորումն անցկացվում է «Ասիա և աշխարհ. ընդհանուր մարտահրավերներ, ընդհանուր պատասխանատվություն» կարգախոսի ներքո, հայտնում է «Ակորդա»-ն։

Ղազախստանի նախագահը համաժողովում ելույթ է ունեցել որպես պատվավոր հյուր։

Կասիմ-Ժոմարտ Տոկաևը նշել է ասիական երկրների միջև տարանցիկ և տրանսպորտային համագործակցության ընդլայնման ռազմավարական նշանակությունը։

Նրա կարծիքով՝ չափազանց կարևոր է մեծացնել ջանքերը՝ ինչպես գործող, այնպես էլ նոր տրանսպորտային երթուղիների զարգացման համար։

«Դրանց թվում է Անդրկասպյան միջազգային տրանսպորտային երթուղին կամ այսպես կոչված «Միջին միջանցքը», որն առավել արդյունավետ կերպով ապահովում է Ասիայի և Եվրոպայի միջև մատակարարման շղթաների անվտանգությունը», - ասել է Ղազախստանի նախագահը։