Մյունխենում ներկայացվել են Ադրբեջանի ծրագրերը՝ Միջին միջանցքի զարգացման վերաբերյալ

Մյունխենում տեղի է ունեցել AZCON Holding-ի մաս կազմող «Ադրբեջանական երկաթուղիներ» ՓԲԸ-ի գործունեության և ապագա ծրագրերի շնորհանդեսը՝ Տրանսկասպյան միջազգային տրանսպորտային երթուղու (Միջին միջանցք) զարգացման վերաբերյալ։

Ինչպես հաղորդում է Сaliber.Az-ը՝ հղում անելով «Ադրբեջանական երկաթուղիներ»-ին, շնորհանդեսը ներկայացրել է ընկերության նախագահի խորհրդական Էմիլ Մամեդովը՝ Մյունխենում կայացած «Transport Logistic 2025» ցուցահանդեսի շրջանակներում կազմակերպված «Ինտերմոդալ փոխադրումների վերագնահատում. Տրանսկասպյան երթուղով անարգել տեղաշարժ և մասնավոր հատվածի դերը» թեմայով պանելային քննարկումների ժամանակ։

Նշվել է, որ «Ադրբեջանական երկաթուղիներ»-ի կողմից միջազգային գործընկերների հետ վարած երկարատև և ակտիվ բանակցությունների արդյունքում Միջին միջանցքով կոնտեյներային փոխադրումների ծավալը և մասնաբաժինը տարեցտարի աճում է։ 2025 թվականի առաջին 4 ամիսներին կոնտեյներային փոխադրումները նախորդ տարվա նույն ժամանակահատվածի համեմատ ավելացել են 56%-ով։