Ադրբեջանը զբոսաշրջային հոսքի առումով մոտենում է նախահամաճարակային ցուցանիշներին

2024 թվականի հունվար-մայիս ամիսներին Ադրբեջան ժամանած զբոսաշրջիկների թիվը կազմել է 965,6 հազար մարդ, ինչը 35,4 տոկոսով ավելի է նախորդ տարվա նույն ժամանակահատվածի համեմատ։

Caliber.Az-ի փոխանցմամբ՝ այս մասին հայտնում է Պետական վիճակագրական կոմիտեն։

Ընդ որում՝ նախահամաճարակային հնգամսյա ցուցանիշի համեմատ, զբոսաշրջային հոսքի ծավալը 11,8%-ով պակաս է։

Ադրբեջան այցելած զբոսաշրջիկների մեծամասնությունը հանդիսանում են հետևյալ երկրների քաղաքացիները. Ռուսաստանի Դաշնություն՝ 28,8%, Թուրքիա՝ 18,2%, Հնդկաստան՝ 9,4%, Իրան՝ 9,3%, Վրաստան՝ 4,3%, Ղազախստան՝ 3%, Սաուդյան Արաբիա՝ 2,5%, Պակիստան՝ 2,4%, Ուզբեկստան և ԱՄԷ՝ 1,7-ական %, Ուկրաինա՝ 1,4%, Թուրքմենստան, Չինաստան և Քուվեյթ՝ 1,3%՝, Բելառուս՝ 1,2%, այլ երկրներ՝ 12,2%։

Ընդհանուր առմամբ, հաշվետու ժամանակահատվածում Ադրբեջան են այցելել 179 երկրների քաղաքացիներ։ Ժամանածների 69,9%-ը եղել են տղամարդիկ, 30,1%-ը՝ կանայք։