Ադրբեջանն ու Ղազախստանը 55 մլն դոլար արժողությամբ 8 պայմանագիր են կնքել

Ղազախ ձեռներեցների՝ Ադրբեջանում բիզնես առաքելության ընթացքում կնքվել է 55 մլն դոլարի 8 պայմանագիր։
 
Այս մասին ասել է Ղազախստանի առևտրի և ինտեգրման նախարար Սերիկ Ժումանգարինը՝ Աստանայի միջազգային ֆորումի (AIF 2023) շրջանակներում Ադրբեջանի էներգետիկայի նախարար Փարվիզ Շահբազովի հետ հանդիպման ժամանակ, հայտնում է Trend-ը:
 
«Առաջարկում եմ շարունակել այս պրակտիկան։ Այժմ մենք սպասում ենք Ադրբեջանից  պատասխան առաքելությանը։ Մենք նաև կարող ենք ադրբեջանական կողմին առաջարկել 110 նոր տեսակի ապրանքներ՝ մոտ 300 մլն դոլար արժողությամբ՝ հետագա առևտրատնտեսական հարաբերությունների ամրապնդման համար»,- ասել է նախարարը։
 
Ժումանգարինն ընդգծել է, որ Ղազախստանը նույնպես ցանկություն է հայտնել մրգերի և բանջարեղենի մատակարարումներ հաստատել Ադրբեջանից, հատկապես դեպի արևմտյան շրջաններ։
 
Նախարարը նշել է, որ երկու երկրների միջև ապրանքաշրջանառությունն այս տարվա առաջին 4 ամիսներին աճել է 50 մլն դոլարով՝ մինչև 183 մլն դոլար։