Ադրբեջանի առևտրային ներկայացուցիչը կոչ է արել թուրք գործարարներին ներդրումներ կատարել Ղարաբաղում

Անկարայում՝ Առևտրա-արդյունաբերական պալատների և բորսաների ասոցիացիայում (TOBB) տեղի է ունեցել հանդիպում Թուրքիայի մայրաքաղաքային շրջանի առաջատար ընկերությունների ներկայացուցիչների և ձեռնարկատերերի հետ՝ Ադրբեջանում ներդրումային հնարավորությունները քննարկելու համար։

AZERTAC-ի փոխանցմամբ՝ հանդիպումը կազմակերպվել է Թուրքիայում Ադրբեջանի առևտրային ներկայացուցչության, Անկարայում Ադրբեջանի դեսպանատան և TOBB-ի ղեկավարության կողմից։

Թուրքիայում Ադրբեջանի առևտրային ներկայացուցիչ Թամերլան Թաղիևը ելույթ է ունեցել ձեռնարկատերերի առջև և խոսել Ղարաբաղի և Արևելյան Զանգեզուրի տնտեսական շրջաններում ներդրողների համար ստեղծված հնարավորությունների մասին։ «Թուրքական ընկերություններն այժմ ակտիվորեն մասնակցում են Ադրբեջանի ազատագրված շրջանների վերականգնմանը և մասնակցում տարբեր պետական մրցույթների», - նշել է առևտրային ներկայացուցիչը։

Առևտրային ներկայացուցիչը նշել է, որ Ադրբեջանի կառավարությունը չի սահմանափակվում միայն ներդրումները խրախուսելու մասին փաստաթղթեր տրամադրելով, այլև առաջարկում է երկարաժամկետ, արտոնյալ վարկեր, պահպանում է բաց ձևաչափ պետական մարմինների հետ համատեղ նախագծերի համար։

Թաղիևն ընդգծել է թուրք ձեռնարկատերերի հատուկ հետաքրքրությունը Ադրբեջանի տնտեսության այնպիսի ոլորտների նկատմամբ, ինչպիսիք են գյուղատնտեսությունը, դեղագործությունը, տեքստիլ արդյունաբերությունը, հանքարդյունաբերությունը, զբոսաշրջությունը և այլն: