Ադրբեջանը նախատեսում է տարեկան արտադրել մինչև 250 էլեկտրական ավտոբուս

Ադրբեջանում 2026 թվականից նախատեսվում է արտադրել տարեկան 200-250 էլեկտրական ավտոբուս։

Ինչպես հայտնում է Caliber.Az-ը, այս մասին ասված է Բաքվի և հարակից տարածքների տրանսպորտային ենթակառուցվածքների կատարելագործման 2025-2030 թվականների պետական ծրագրում, որը հաստատվել է Ադրբեջանի նախագահ Իլհամ Ալիևի կողմից։

Փաստաթղթում նշվում է, որ ավտոբուսային պարկի արդիականացումը շարունակում է մնալ սպասարկման որակի բարձրացման և հասարակական տրանսպորտում ուղևորների անվտանգության ապահովման հիմնական առաջնահերթություններից մեկը։

«Անցյալ տարի հանրապետություն է ներմուծվել 160 ժամանակակից էլեկտրական ավտոբուս, ինչը կարևոր քայլ էր մինչև 2030 թվականը մայրաքաղաքի ողջ հասարակական տրանսպորտը էլեկտրականով փոխարինելու նպատակին հասնելու ուղղությամբ։ Ներմուծվող էլեկտրական ավտոբուսների հետ մեկտեղ այս տարվանից առաջնահերթ է համարվում նաև տեղական շուկայում այդ ավտոբուսների պահեստամասերի արտադրության կազմակերպումը»,- ընդգծվում է ծրագրում։