Կասպից ծովը ծանծաղում է, ձկան պաշարները՝ քչանում ՄԱՆՐԱՄԱՍՆԵՐ ԼՈՒՍԱՆԿԱՐ

Կասպից ծովի ջրի մակարդակի անկումը հանգեցրել է լուրջ բնապահպանական հետևանքների ափամերձ տարածքներում: Լենքորանի ափերին ծովի նահանջի պատճառով մերկացած ստորջրյա ժայռերը սահմանափակել են ձկնորսական նավերի տեղաշարժը:

AZERTAC-ի փոխանցմամբ՝ բնապահպանական խնդիրը ազդել է նաև ծովային էկոհամակարգի վրա: Ձկների վտառները նահանջել են ավելի խորը ջրեր, ինչը հանգեցրել է ափամերձ ջրերում ձկան պաշարների կտրուկ նվազմանը:

Բնապահպանների կարծիքով՝ Կասպից ծովի ջրի մակարդակի անկումը երկարաժամկետ բնույթ է կրում: Մասնագետները նշում են, որ ձկների նահանջը ավելի խորը ջրեր պահանջում է ձկնորսական վայրերի վերագնահատում և ափամերձ տարածքներում անվտանգության ուժեղացված միջոցառումներ:

Բնապահպան Նազիմ Մամեդովը պնդում է, որ Կասպից ծովի ջրի մակարդակի անկման հիմնական պատճառը գլոբալ տաքացումն ու կլիմայի փոփոխությունն է: Նրա խոսքով՝ Կասպից ծով թափվող հիմնական գետերի՝ Ադրբեջանի Կուր գետի և Ռուսաստանի Վոլգա և Ուրալ գետերի ջրի մակարդակի անկումը լրջորեն ազդել է ծովի ընդհանուր ջրային հաշվեկշռի վրա. «Նախկինում Կասպից ծովի մակերեսային ջրերում գերակշռում էին այնպիսի ձկնատեսակներ, ինչպիսիք են կարմրակը, կուտումը և կարպը, բայց այժմ, ջրի մակարդակի անկման պատճառով, այս տեսակները նահանջել են ծովի ավելի խորը մասեր։ Ավելի խորը ջրերում գերակշռում են այնպիսի ձկնատեսակներ, ինչպիսիք են կեֆալը և սարյակը»։