ՎԶԵԲ-ի ընդհանուր ներդրումների ծավալն Ադրբեջանում գերազանցել է 4 միլիարդ եվրոն

2024 թվականի դեկտեմբերի 31-ի դրությամբ՝ Վերակառուցման և զարգացման եվրոպական բանկի (ՎԶԵԲ) ընթացիկ վարկային պորտֆելը Ադրբեջանում կազմել է 1,052 միլիարդ եվրո։
 
Ինչպես հաղորդում է Report-ը՝ ՎԶԵԲ-ին հղումով, պորտֆելի ծավալը մեկ ամսվա ընթացքում աճել է 2,14%-ով (22 մլն եվրո): Համեմատության համար նշենք, որ 2024 թվականի նոյեմբերի 30-ի դրությամբ այն գնահատվել է 1,03 միլիարդ եվրո և  ներառել է 32 նախագիծ:
 
2025 թվականի սկզբի դրությամբ Ադրբեջանում բանկի պորտֆելը ներառում է 33 նախագիծ։
 
ՎԶԵԲ-ի տվյալներով՝ պորտֆելի մեծ մասը՝ 92%-ը (964 մլն եվրո) ուղղված է կայուն ենթակառուցվածքների զարգացմանը: Եվս 5%-ը (54 մլն եվրո) ստացվել է կորպորատիվ հատվածից, իսկ 3%-ը (34 մլն եվրո) ֆինանսական հաստատություններից:
 
Ընդհանուր առմամբ, ՎԶԵԲ-ը 195 նախագծերի  շրջանակներում՝ Ադրբեջանում ներդրել է ավելի քան 4,04 մլրդ եվրո։
 
Բանկի գործառնական ակտիվները երկրում 2024 թվականի դեկտեմբերի 31-ի դրությամբ կազմել են 754 մլն եվրո՝ հոկտեմբերի 31-ի ցուցանիշի համեմատ աճելով 13,21%-ով (88 մլն եվրո):