Ադրբեջանն ազատված է Թուրքիայի կողմից սահմանված բարձրացված մաքսատուրքերից

Թուրքիայի կառավարության որոշմամբ ավելացվել են՝ Առևտրի համաշխարհային կազմակերպության (ԱՀԿ) անդամ չհանդիսացող երկրներից պլաստմասսե արտադրանքի որոշակի տեսակների ներմուծման մաքսատուրքերը։ Բացառություն է արվել միայն Ադրբեջանի համար։
 
AZERTAC-ի փոխանցմամբ՝ ներմուծման ռեժիմը փոխելու մասին նախագահ Ռեջեփ Թայիբ Էրդողանի  կարգադրությունը հրապարակվել է Թուրքիայի կառավարության պաշտոնական տեղեկագրում՝ Resmi Gazete-ում։
 
Թուրքիայի առևտրի նախարարության տվյալներով՝ մաքսատուրքերի բարձրացումը պայմանավորված է ներքին արտադրությունը պաշտպանելու և խթանելու ու երկրի առևտրային դեֆիցիտը նվազեցնելու ցանկությամբ։
 
Կառավարության որոշմամբ՝ ԱՀԿ անդամ չհանդիսացող երկրներից (բացառությամբ Ադրբեջանի) ներկրվող մեկ տոննա պլաստմասսայե արտադրանքի վրա լրացուցիչ մաքսատուրք կգանձվի 50-400 դոլարի սահմաններում։
 
Որոշումն ուժի մեջ կմտնի հրապարակումից 30 օր հետո։