Սաուդյան Արաբիայից տասնյակ ընկերությունների ներկայացուցիչներ կայցելեն Ադրբեջան

Սաուդյան Արաբիայից մոտ 70 խոշոր ընկերությունների ներկայացուցիչներ սեպտեմբերի 30-ին կայցելեն Ադրբեջան։

Ինչպես հայտնում է Caliber.Az-ը՝ հղում անելով Արտահանման և ներդրումների խթանման գործակալությանը (AZPROMO), այս մասին հայտարարվել է AZPROMO-ի գործադիր տնօրեն Յուսիֆ Աբդուլլաևի և Ադրբեջանում Սաուդյան Արաբիայի դեսպան Իսսամ բեն Սալեհ ալ-Ջութեյլիի հանդիպմանը։

Հանդիպմանը կողմերը քննարկել են նաև «Պարսից ծոց-Ադրբեջան» տնտեսական համաժողովը, որը կանցկացվի սեպտեմբերի 26-ին Բաքվում։

Հիմնադրամի ղեկավարը և դեսպանը կարևորել են երկու երկրների գործարար շրջանակների միջև կապերի զարգացումը։ Այդ կապակցությամբ Աբդուլլաևն առաջարկել է գործարար շրջանակների միջև համատեղ ներդրումային նախագծեր իրականացնել, ինչը թույլ կտա ընդլայնել առևտրատնտեսական կապերը։