Շահբազով. Ղրղզստանն ու Տաջիկստանը կկարողանան մասնակցել «կանաչ» նախագծին՝ Ադրբեջանի մասնակցությամբ

Կենտրոնական Ասիայի երկրները կկարողանան միանալ «կանաչ» նախագծին, որում  ներկայացված են Ադրբեջանը, Ղազախստանը և Ուզբեկստանը։
 
Ինչպես հաղորդում է Сaliber.Az-ը, այս մասին հայտարարել է՝ Ադրբեջանի էներգետիկայի նախարար Փարվիզ Շահբազովը։
 
«Ուզում եմ նշել, որ Ադրբեջանի, Ղազախստանի և Ուզբեկստանի միջև էներգետիկ նախագիծը չի սահմանափակվում միայն այս երեք երկրներով։ Կենտրոնական Ասիայի մյուս երկրները, մասնավորապես Ղրղզստանը և Տաջիկստանը, որոնք ունեն մեծ էներգետիկ ռեսուրսներ, հատկապես հիդրո ռեսուրսներ, իհարկե, ապագայում կարող են մեծ հաջողությամբ միանալ այս նախագծին` անպայման իրենց ներդրումն ունենալով դրա զարգացման գործում»,- ուրբաթ օրը՝ Կենտրոնական Ասիայի համար էներգետիկ անցման վերաբերյալ COP29-ի շրջանակներում անցկացվող ներդրումային ֆորումում ասել է Շահբազովը:
 
Նախարարը նշել է, որ Ադրբեջանի, Ղազախստանի և Ուզբեկստանի միջև փաստաթղթի ստորագրումից հետո, աշխատանք է սկսվել՝ երեք երկրների էներգետիկ համակարգի ինտեգրման համար նյութատեխնիկական ուսումնասիրության ուղղությամբ։ Այս համատեքստում նա նշել է, որ վերջերս խորհրդատվական ֆորումներ են անցկացվել։