Բորդոն. Ադրբեջանը ԱՄՀ-ի վարկերի կարիքը չունի

Ադրբեջանն Արժույթի միջազգային հիմնադրամի (ԱՄՀ) վարկային ծրագրի կարիքը չունի, քանի որ բավարար ֆինանսական պահուստներ ունի։
 
Ինչպես հաղորդում է Caliber.Az-ը, այս մասին AZERTAC-ին տված հարցազրույցում հայտարարել է՝ Ադրբեջանում Արժույթի միջազգային հիմնադրամի առաքելության ղեկավար Աննա Ռոուզ Բորդոնը։
 
«Այս տարվա մարտին Արժույթի միջազգային հիմնադրամն ավարտեց իր IV հոդվածի շրջանակներում  խորհրդատվական առաքելությունը։ Այս խորհրդակցություններում մասնավորապես ընդգծվեց հարկաբյուջետային կոնսոլիդացիայի, դրամավարկային քաղաքականության բարելավման, տնտեսական դիվերսիֆիկացիայի և կառուցվածքային բարեփոխումների անհրաժեշտությունը՝ կայուն աճ ապահովելու համար։ Խորհրդատվական առաքելությունից բացի, Արժույթի միջազգային հիմնադրամը շարունակական հիմունքներով տեխնիկական աջակցություն է ցուցաբերում Ադրբեջանին», - նշել է Աննա Ռոուզ Բորդոնը։