Ռովշան Ռուստամովը՝ Բաքու-Թբիլիսի-Կարս երկաթուղու դերի մասին

Բաքու-Թբիլիսի-Կարս երկաթուղին (ԲԹԿ), որպես Ադրբեջանի, Վրաստանի և Թուրքիայի միջև բեռնափոխադրման հիմնական գիծ, կարևոր դեր է խաղում տարածաշրջանային տրանսպորտային համակարգում։

Сaliber.Az-ի փոխանցմամբ՝ այս մասին հայտարարել է «Ադրբեջանական երկաթուղիներ» ընկերության նախագահ Ռովշան Ռուստամովը Ղազախստանում անցկացվող «Նոր մետաքսի ճանապարհ» 7-րդ միջազգային տրանսպորտային և լոգիստիկ բիզնես ֆորումի շրջանակներում կազմակերպված «Երկաթուղային ենթակառուցվածքների զարգացումը Եվրասիական տարածքում» խորագրով պանելային քննարկումների ժամանակ։

Նրա խոսքով՝ ԲԹԿ-ն և Զանգեզուրի միջանցքը համատեղ կբարձրացնեն տարածաշրջանի տարանցիկ հնարավորությունները՝ ստեղծելով առևտրային հոսքերը աջակցող միասնական ցանց։

Քննարկումների ժամանակ շոշափվել են այնպիսի թեմաներ, ինչպիսիք են Միջին միջանցքը, նավահանգիստների և երկաթուղիների ինտեգրումը, տեխնոլոգիական արդիականացումը և տարանցիկ հնարավորությունների ավելացումը։

Անդրադառնալով Ադրբեջանի երկաթուղիների բեռնափոխադրումների ներկայիս ցուցանիշներին՝ Ռուստամովն ընդգծել է, որ այս տարվա առաջին 9 ամիսներին Միջին միջանցքով Չինաստանից ստացվել է 296 բլոկային գնացք, այդ թվում՝ 113 տարանցիկ գնացք, նշել է, որ այս ցուցանիշը զգալիորեն գերազանցում է նախորդ տարվա նույն ժամանակահատվածի ցուցանիշը (213 գնացք):