Թուրքիայի դեսպան. Մենք մտադիր ենք Ադրբեջանի հետ ապրանքաշրջանառությունը հասցնել 15 միլիարդ դոլարի

Թուրքիան մտադիր է Ադրբեջանի հետ ապրանքաշրջանառությունը 8 մլրդ դոլարից հասցնել 15 մլրդ դոլարի։
 
Այս մասին Ադրբեջանում Թուրքիայի դեսպան Ջահիթ Բաղչին ասել է՝ Թուրքիայի Հանրապետության ստեղծման 101-րդ տարեդարձի առթիվ կազմակերպված ընդունելությանը։
 
Նա նշել է, որ Թուրքիայի և Ադրբեջանի միջև գոյություն ունի յուրահատուկ եղբայրություն.
 
«Ադրբեջանն  իր ուժերով ապահովեց արդարությունը Հարավային Կովկասում, ինչը չկարողացավ ապահովել համաշխարհային համակարգը։ Բոլորը պետք է իմանան, որ այն խաղաղությունը, որը կհաստատվի տարածաշրջանում, օգուտ կբերի ոչ միայն տարածաշրջանին, այլև ողջ աշխարհին։ Թուրքիան այս ճանապարհին միշտ կլինի Ադրբեջանի կողքին, և ոչ մի ուժ չի կարողանա խաթարել այդ բարեկամությունը»։
 
Դեսպանն ասել է, որ Թուրքիան լիակատար աջակցություն կցուցաբերի Ադրբեջանին՝ ՄԱԿ-ի Կլիմայի փոփոխության շրջանակային կոնվենցիայի (COP29) Կողմերի համաժողովի 29-րդ նստաշրջանի ժամանակ. «Թուրքիան համաժողովին կմասնակցի ամենաբարձր մակարդակով»։