Ադրբեջան է ժամանել Ռուսաստանի և Ուկրաինայի ավելի քան մեկուկես միլիոն քաղաքացի

2022 թվականի մարտից մինչև 2024 թվականի հուլիսը Ադրբեջան է ժամանել՝ Ռուսաստանի և Ուկրաինայի 1 միլիոն 535 հազար 889 քաղաքացի։

Ինչպես հայտնում է Caliber.Az-ը, այս մասին ասված է Պետական վիճակագրական կոմիտեի հաղորդագրության մեջ։ 2022 թվականի մարտ-դեկտեմբերին Ռուսաստանից երկիր է մուտք գործել 397 հազար 5, Ուկրաինայից՝ 24 հազար 609 մարդ։

Անցյալ տարի Ռուսաստանից Ադրբեջան ժամանողների թվի կտրուկ աճ է նկատվել։ Այսպես, երկիր ժամանող Ռուսաստանի քաղաքացիների թիվն ավելացել է ավելի քան 200 հազարով և հասել 624 հազար 753 մարդու։ Բացի այդ, նախորդ տարի Ադրբեջան է մուտք գործել Ուկրաինայի 31 հազար 267 քաղաքացի։ Ընթացիկ տարվա հունվար-հուլիսին Ադրբեջան է մուտք գործել Ռուսաստանի 438 հազար 66 և Ուկրաինայի 20 հազար 189 քաղաքացի։

Նշենք, որ Ռուսաստանի և Ուկրաինայի միջև պատերազմը սկսվել է 2022 թվականի փետրվարի 24-ին։