Էդի Ռամա. ադրբեջանական գազը վճռորոշ նշանակություն ունի Եվրոպայի ապագայի համար

Հարավային գազային միջանցքը (SGC) կարևոր դեր է խաղում Եվրոպայի էներգետիկ անվտանգության մեջ:

Ինչպես հաղորդում է Report-ը, այս մասին մարտի 1-ին Բաքվում՝ Հարավային գազային միջանցքի խորհրդատվական խորհրդի և Կանաչ էներգետիկայի խորհրդատվական խորհրդի 2-րդ նախարարական նիստի ժամանակ ասել է Ալբանիայի վարչապետ Էդի Ռաման։

Նրա խոսքով՝ ՀԳՄ-ն դարձել է ինտենսիվ համագործակցության կամուրջ՝ մերձեցնելով երկրները, ընկերությունները և միջազգային ֆինանսական կառույցները։

«Այսօր մենք բոլորս կարող ենք վկայել, որ Հարավային գազային միջանցքն արդեն փոխել է բազմաթիվ կյանքեր և ավելի անվտանգ դարձրել Եվրոպան։ Մինչ Եվրոպան ավելացնում է ՀԳՄ-ի մատակարարումները, Հարավային գազային միջանցքը, անկասկած, կմնա ԵՄ-ին մատակարարվող գազատարով գազի սակավաթիվ կայուն և մրցունակ աղբյուրներից մեկը»,- ասել է Ռաման։

Ալբանիայի վարչապետի խոսքով՝ ադրբեջանական գազը վճռորոշ նշանակություն ունի Եվրոպայի ընդհանուր ապագայի համար։