Էլմար Մամեդյարով. Ադրբեջանին Հայաստանի հետ «հում» հաշտության պայմանագիր պետք չէ

«Ես կողմ եմ Հայաստանի հետ ուղիղ բանակցություններին, քանի որ որքան շատ են միջնորդները, այնքան շատ են նրանք ցանկանում տեսնել իրենց ազգային շահն այս հարցում։ Բայց կար մի շատ հետաքրքիր դրական պահ. չնայած Հայաստանի հեծեծանքին՝ հնչեցին դեպի Խանքենդի ճանապարհ բացելու առաջարկներ, և դա Երևանին զրկեց այսպես կոչված «շրջափակման» մասին փաստարկից: Ի վերջո, պետք է այնտեղ՝ ճանապարհի վրա տեղադրել «Asan ծառայության» կետ Ղարաբաղի այն հայերի համար, ովքեր, հնարավոր է, ցանկանում են հենց հիմա ստանալ Ադրբեջանի քաղաքացիություն»։

Այս մասին Caliber.Az-ին տված տեսազրույցում ասել է Ադրբեջանի նախկին արտգործնախարար Էլմար Մամեդյարովը։

«Եվ մենք պետք է շարունակենք ճնշումը՝ օգտագործելով մեր ողջ քաղաքական կշիռը, քանի որ այս պայմաններում չի կարելի համաձայնել այն պայմաններին, որոնք ապագայում կվերածվեն ժամային ռումբի։ Չեմ բացառում նաև ռազմական տարբերակը: «Հում» փաստաթուղթ ձեռք բերելու համար պետք չէ շտապել։ Փաստաթուղթը պետք է լինի երկաթբետոնե, կենսունակ լինի դարեր շարունակ, Ադրբեջանի մարմնի վրա պոտենցիալ խոցեր չթողնի։ Այս գործընթացը ընթացքի մեջ է, մենք դրա ակտիվ մասնակիցներն ենք»,- ասել է Մամեդյարովը: