Համաշխարհային բանկը նշել է Ղարաբաղի հետ կապված առաջնահերթությունները

Համաշխարհային բանկը պատրաստում է Ադրբեջանի հետ նոր գործընկերության շրջանակային փաստաթուղթ և մոտ ապագայում քննարկումներ կսկսի Ադրբեջանի կառավարության հետ։

Այս մասին Сaliber.Az-ին ասել է Ադրբեջանի գծով Համաշխարհային բանկի մենեջեր Սառա Մայքլը։

«Մենք այս ռազմավարությունը կկառուցենք «Ադրբեջան 2030. սոցիալ-տնտեսական զարգացման ազգային առաջնահերթություններ» փաստաթղթի հիման վրա»,- ասել է Մայքլը։

Նրա խոսքով՝ սա Համաշխարհային բանկի՝ Ադրբեջանի հետ համագործակցության հնգամյա նախագիծն է. «Առաջիկա մի քանի ամիսների ընթացքում մենք կորոշենք, թե կառավարությունը նոր ռազմավարության մեջ ինչ առաջնահերթությունների վրա է ցանկանում ուշադրություն դարձնել՝ ինչպես ներդրումների, այնպես էլ գիտելիքների փոխանակման և ներուժի ստեղծման տեսակետից։ Երկրում կան բազմաթիվ տարբեր առաջնահերթություններ՝ կապված ինչպես մարդկային կապիտալի զարգացման, մասնավոր հատվածին աջակցելու, այնպես էլ Ղարաբաղում վերականգնման և վերակառուցման հետ, այդ թվում՝ մաքուր էներգիայի առումով։ Այսպիսով, մենք պետք է հանդիպենք տարբեր գործընկերների հետ՝ իմանալու, թե որ ոլորտների վրա կցանկանային, որ մենք կենտրոնանանք»։