Հնդկաստանը հրթիռներ կմատակարարի Հայաստանին ԼՈՒՍԱՆԿԱՐ

Հնդկաստանի պաշտպանության նախարարությունը ստորագրել է՝ Հայաստանին հրթիռների, ռեակտիվ արկերի և զինամթերքի արտահանման խոշոր պատվերը։

Ինչպես փոխանցում է Caliber.Az-ը՝ վկայակոչելով հայկական լրատվամիջոցներին, սպառազինության մատակարարման մասին պայմանագիրը երկու երկրների կառավարությունները ստորագրել են սեպտեմբերի սկզբին։ Գործարքի արժեքը չի հրապարակվում, սակայն ենթադրաբար մոտակա ամիսներին նախատեսվում է Հայաստան մատակարարել ավելի քան 240 մլն դոլարի սպառազինություն։

Պատվերը ներառում է պատմության մեջ առաջի անգամ տեղական «Pinaka» բազմափողանի հրթիռային կայանների արտահանումը, որոնք արդեն գտնվում են հնդկական բանակի սպառազինության մեջ: Հզոր զենքը մշակվել է Պաշտպանական հետազոտությունների և զարգացման կազմակերպության (DRDO) կողմից և արտադրվում է Հնդկաստանի մասնավոր ընկերությունների կողմից։

Մարտական մեքենան տեղակայված է «Tatra-815 Colos WN (8x8)» -ի բարձր անցունակությամբ մոդիֆիկացված շասսիի անիվային բազայի վրա։

Համակարգի հրետանային մասը, որը գտնվում է մարտական մեքենայի հետնամասում, իրենից ներկայացնում է 6 խողովակային ուղղորդիչներով 2 փաթեթ։ Տարբեր մարտագլխիկներով հրթիռներն ունեն 37,5-ից մինչև 60 կմ հեռահարություն, վերամշակման փուլում են 90 և 120 կմ հրթիռները։

Ճանապարհին առավելագույն արագությունը կազմում է 80 կմ/ժ։ Մարտական մեքենան հագեցված է կրակի կառավարման ժամանակակից համակարգերով և տեղանքի հետ տեղագրական կապով, որոնք լիովին ավտոմատացված են, ինչպես նաև գիշերային տեսողության ինֆրակարմիր սարքերով: ՀԿՀՀ-ից ամբողջական համազարկի ժամանակը 44 վայրկյան է: Տրանսպորտալիցքավորող մեքենայի օգնությամբ մարտական մեքենան լիցքավորվում է 15 րոպեում։ Աշխատանքներ են տարվում նաև վերալիցքավորման ժամանակը մինչև 4 րոպե կրճատելու ուղղությամբ։

Կոմպլեքսային գործարքի շրջանակներում Հնդկաստանը Հայաստանին կմատակարարի նաև հակատանկային հրթիռներ և այլ զինամթերք։ Սա առաջին անգամ չէ, որ սպառազինության համակարգեր են արտահանվում Հայաստան։ 2020 թվականին Հնդկաստանը երկրին մատակարարեց չորս Swathi ռադարներ:

Հնդկական բանակի առանձնահատկություններին համապատասխան մշակված այս ռադարներն օգտագործվում են մոտեցող հրետանային արկերին, ականանետներին և հրթիռներին հետևելու համար, ինչպես նաև թշնամու արձակման կայանների ու դիրքերի գտնվելու տեղերը որոշելու համար: Ռադարները հաջողությամբ օգտագործվել են Պակիստանի և Չինաստանի սահմաններին։