ՎԶԵԲ-ը և Ադրբեջանը պայմանագրեր կստորագրեն այլընտրանքային էներգիայի ոլորտում

Վերակառուցման և զարգացման եվրոպական բանկը (ՎԶԵԲ) և Ադրբեջանը շուտով պայմանագրեր կստորագրեն այլընտրանքային էներգետիկայի ոլորտում։

Այս մասին երեքշաբթի ասել է՝ Բաքվում ՎԶԵԲ-ի գրասենյակի ղեկավար Կամոլա Մախմուդովան՝ ԵՄ-Ադրբեջան գործարար համաժողովում, հայտնում է Caliber.Az-ը։

Նրա խոսքով, նախորդ տարիներին բանկը Ադրբեջանում նախագծեր է իրականացրել «կանաչ» տեխնոլոգիաների ոլորտում՝ ապահովելով արդյունաբերական թափոնների անվտանգությունը։

«Այդ աշխատանքներն իրականացվել են խոշոր քաղաքներում, և այս միտումը կշարունակվի նաև ապագայում։ Բացի այդ, ՎԶԵԲ-ը ներգրավված է այլ խոշոր ծրագրերում, մասնավորապես, գյուղատնտեսության և տրանսպորտի ոլորտներում, ինչպես նաև այլընտրանքային էներգիայի ոլորտում: Բանկը նախատեսում է ընդլայնել իր մասնակցությունը այլընտրանքային էներգիայի ոլորտում։ Միաժամանակ, նախատեսվում է համապատասխան պայմանագրեր ստորագրել մինչև մայիսի վերջը՝ համապատասխանաբար 230 և 100 ՄՎտ դրվածքային հզորությամբ էլեկտրակայանների կառուցման շրջանակներում»,- ասել է Մախմուդովան։