Ֆրանսիայի ադրբեջանական համայնքը իր բողոքն է հայտնել ԵԽԽՎ-ին

Ֆրանսիայի ադրբեջանական համայնքը դատապարտել է Եվրոպայի խորհրդի խորհրդարանական վեհաժողովի (ԵԽԽՎ) որոշումը՝ չհաստատել ադրբեջանական պատվիրակության լիազորությունները։

Ինչպես Caliber.Az-ին հայտնել են Սփյուռքի հետ աշխատանքի պետական կոմիտեից, համատեղ հայտարարությունը ԵԽԽՎ-ին է հասցեագրվել Ֆրանսիայում ադրբեջանցիների համակարգող խորհրդի անունից։

Հայտարարության մեջ անընդունելի է որակվել նման բանաձևի ընդունումը ԵԽ-ին Ադրբեջանի անդամակցության 23-րդ տարեդարձի նախաշեմին։

«Ադրբեջանական պետությունը հավատարիմ է Մարդու իրավունքների եվրոպական դատարանի որոշումներին և բանաձևերին։ Սա համագործակցության կարևոր ցուցիչ է՝ ի շահ երկրում քաղաքացիական հասարակության։ ԵԽԽՎ բանաձևը մենք դիտարկում ենք որպես երկկողմ համագործակցության արդյունքները ոչնչացնելու փորձ»,- ասվում է փաստաթղթում։

Հայտարարության մեջ նշվում է նաև, որ ներկայիս պայմաններում, երբ Եվրոպայի դռների մոտ տեղի են ունենում ողբերգական աշխարհաքաղաքական իրադարձություններ, նման որոշում կայացնելով ԵԽԽՎ-ն միայն խարխլում է սեփական արժեքները։

«Ֆրանսիայի ադրբեջանական համայնքը ԵԽԽՎ-ին կոչ է անում միջազգային իրավունքի ուժն ու սկզբունքները չվերածել այնպիսի երկրների վրա ճնշում գործադրելու միջոցի, ինչպիսին Ադրբեջանն է»,- ասվում է հայտարարության մեջ։