Զանգեզուրի միջանցքի բացումը երկու շաբաթով կնվազեցնի Չինաստանից ապրանքների առաքման ժամանակը

Զանգեզուրի միջանցքի բացումը հնարավորություն կտա՝ Չինաստանից ծովով Ադրբեջան և տարածաշրջանի երկրներ բերվող ապրանքները երկու շաբաթ ավելի արագ հասցնել։

Ինչպես հայտնում է Caliber.Az-ը, այս մասին ասել է՝ «Բաքվի միջազգային ծովային առևտրային նավահանգիստ» ՓԲԸ-ի ռազմավարական պլանավորման և զարգացման դեպարտամենտի ղեկավար Խուդայար Հասանլին։

Նա նշել է, որ ձեռներեցների համար ժամանակի խնայողությունը կարևոր գործոն է, որն ազդում է նաև գների վրա. «Դրա շնորհիվ ձեռներեցներն ավելի շատ եկամուտներ կունենան։ Վրաստանի նավահանգիստների ծառայությունները թանկ են և այլընտրանք չունեն։ Եթե ապրանքները տեղափոխվեն Թուրքիայի Մերսին նավահանգստով Զանգեզուրի միջանցքով, ապա այն երկու անգամ էժան կլինի: Միաժամանակ, սահմանային անցակետի բացակայությունը կազդի նաև առաքման ժամկետների և գների վրա»։

«Թուրքիայից եկող բեռնատարները Զանգեզուրի միջանցքով Նախչըվանից մինչև Բաքվի նավահանգիստ, այնտեղից Ասիա և հակառակը կկարողանան ավելի էժան և արագ ճանապարհորդել։ Զանգեզուրի միջանցքը նշանակալի է նաև Կենտրոնական Ասիայի երկրներից պարարտանյութերի տեղափոխման տեսանկյունից»,- նշել է Հ.Հասանլին։