Ադրբեջանը կարող է դառնալ Չինաստանից Եվրոպա տանող երկաթուղային զարկերակի առանցքային օղակը

Չինաստան-Ղրղզստան-Ուզբեկստան երթուղին մտադիր է Ադրբեջանին ներգրավել միջազգային երկաթուղային նախագծում։

Caliber.Az-ի փոխանցմամբ՝ այս մասին լրագրողներին ասել է Ղրղզստանի պետական երկաթուղային ընկերության գլխավոր տնօրեն Ազամատ Սակիևը։

«Ղրղզստանում մեկնարկել է Կենտրոնական Ասիայի և համաշխարհային լոգիստիկայի համար ռազմավարական նշանակություն ունեցող մասշտաբային մեգա-նախագիծ։ Խոսքը Չինաստան-Ղրղզստան-Ուզբեկստան երթուղու մասին է, որը ապագայում կմիավորվի Թուրքմենստանով, Ադրբեջանով, Թուրքիայով անցնող և դեպի Եվրոպա տանող տրանսպորտային միջանցքների հետ։ Մենք նախատեսում ենք այս երթուղին առաջ տանել Ադրբեջանում՝ հետաքրքրություն առաջացնելու և նրա մասնակցությունը նախագծին ապահովելու համար», - նշել է նա։

Ա. Սակիևի խոսքով՝ շինարարական աշխատանքներն արդեն սկսվել են։

«Նախագիծը նախատեսվում է ավարտել և ճանապարհը շահագործման հանձնել մինչև 2030 թվականը։ Առաջին փուլում թողունակությունը կկազմի տարեկան մոտ 5 միլիոն տոննա, իսկ հետագայում՝ մինչև 15 միլիոն տոննա։ Երթուղու յուրահատկությունը դրա արագությունն է: Չինաստանից Եվրոպա ապրանքների մատակարարումը կտևի ընդամենը յոթ օր», - ասել է Սակիևը։