Ադրբեջանը կերկարաձգի Իրանի տարածքով դեպի Նախչըվան գազի մատակարարումների ժամկետները

Ադրբեջանը համաձայնության է եկել Իրանի տարածքով դեպի Նախչըվանի Ինքնավար Հանրապետություն բնական գազի մատակարարումների ժամկետները  երկարաձգելու վերաբերյալ։

Այս մասին Caliber.Az-ին հայտնել են SOCAR-ից։

Քանի որ գործող համաձայնագրի ժամկետը լրանում է այս տարի, կողմերի միջև նոր պայմանավորվածություն է ձեռք բերվել, և փաստաթուղթը ներկայումս ստորագրման փուլում է։

Պաշտոնական տեղեկատվության համաձայն՝ Նախչըվանի կապույտ վառելիքի տարեկան պահանջարկը կազմում է 260-300 միլիոն խորանարդ մետր։ Այս պահանջարկը բավարարելու համար Ադրբեջանը 2005 թվականին Իրանի հետ համաձայնագիր է կնքել փոխանակման մեխանիզմի հիման վրա։ Պայմանավորվածության համաձայն՝ Իրանը Նախչըվան գազ է մատակարարում Ջուլֆայից, իսկ դրա դիմաց նույն ծավալի գազ է ստանում Ադրբեջանից՝ Աստարայի միջոցով։