Ադրբեջանը՝ ՄԱԿ-ի Զբոսաշրջության համաշխարհային կազմակերպության գործադիր խորհրդի անդամ

Հաստատվել է Ադրբեջանի անդամակցությունը ՄԱԿ-ի Զբոսաշրջության համաշխարհային կազմակերպության (UNWTO) գործադիր խորհրդին։

Caliber.Az-ի փոխանցմամբ՝ այս մասին ասված է Ադրբեջանի Պետական զբոսաշրջության գործակալության հաղորդագրության մեջ։

Այս որոշումը կայացվել է UNWTO-ի գործադիր խորհրդի 124-րդ և 125-րդ նստաշրջաններում, որոնք տեղի են ունեցել նոյեմբերի 7-ից 11-ը Էր-Ռիադում։

Ադրբեջանական պատվիրակությունը մասնակցել է նաև կազմակերպության Գլխավոր ասամբլեայի 26-րդ նստաշրջանին։

«Գլխավոր ասամբլեայի նիստի շրջանակներում տեղի է ունեցել հանդիպում Պետական զբոսաշրջության գործակալության նախագահ Ֆուադ Նաղիևի և Բրազիլիայի զբոսաշրջության նախարարության պետական քարտուղար Անա Կարլա Մաչադո Լոպեսի միջև։ Հանդիպման ընթացքում ստորագրվել է «Ադրբեջանի պետական զբոսաշրջության գործակալության և Բրազիլիայի զբոսաշրջության նախարարության միջև զբոսաշրջության ոլորտում համագործակցության վերաբերյալ փոխըմբռնման հուշագիր», - նշվում է հայտարարության մեջ։