Իսլամաբադում բացվել է Ադրբեջանա-պակիստանյան առևտրա-արդյունաբերական պալատ

Պակիստանի մայրաքաղաք Իսլամաբադում տեղի է ունեցել Ադրբեջանա-պակիստանյան առևտրա-արդյունաբերական պալատի բացումը։

Ինչպես հայտնում է Report-ը՝ հղում անելով Ադրբեջանի դեսպանատանը, միջոցառմանը մասնակցել են Պակիստանի ներդրումների նախարար Աբդուլ Ալիմ Խանը, դիվանագետներ, պետական կառույցների, բիզնեսի և հասարակայնության ներկայացուցիչներ։

Արարողությանը Ադրբեջանի դեսպան Խազար Ֆարհադովը նշել է երկու երկրների միջև դիվանագիտական հարաբերությունների բարձր մակարդակը և խոսել հարկային արտոնությունների, ներդրումային հնարավորությունների, ինչպես նաև մինչև 2027 թվականի դեկտեմբերի 31-ը պակիստանյան բրնձի ներմուծման մաքսատուրքերից ազատման մասին։

Ելույթ են ունեցել նաև Պակիստանի ներդրումների նախարար Աբդուլ Ալիմ Խանը, Պակիստանի Առևտրաարդյունաբերական պալատների ֆեդերացիայի նախագահ Աթիֆ Իքրամ Շեյքը և Ադրբեջանա-պակիստանյան առևտրա-արդյունաբերական պալատի նախագահ Էհսան Զաֆար Բախտավարին։ Նրանք ընդգծել են տնտեսական համագործակցության աճը և Ադրբեջանում բարենպաստ ներդրումային միջավայրի առկայությունը։