6-րդ Կասպիական բիզնես ֆորումը Նյու Յորքում. օրակարգում է Միջին միջանցքը

Նյու Յորքում  անցկացվել է՝ «Միջին միջանցքի երկայնքով. կապ, ֆինանսներ և էներգետիկա» թեմայով Կասպիական քաղաքականության կենտրոնի կողմից կազմակերպված՝ 6-րդ Կասպիական  բիզնես ֆորումը։
 
AZERTAC-ի փոխանցմամբ, բացման խոսքով հանդես եկող, Կասպիական քաղաքականության կենտրոնի տնօրեն Աֆգան Նիֆթին ասել է, որ Կասպիական տարածաշրջանում վերջին երկու ամիսների ընթացքում տեղի ունեցած զարգացումները ուշագրավ են։ Նա նշել է, որ այդ իրադարձությունների թվում են՝ Հայաստանի և Ադրբեջանի միջև երկար սպասված խաղաղության համաձայնագրի նախաստորագրումը, Միջին միջանցքի զարգացման գործում առաջընթացը, տարբեր միջազգային դոնորների ներգրավումը և ներդրումների աճը։
 
Աֆգան Նիֆթիի խոսքով, ԱՄՆ աջակցությամբ Հայաստանի և Ադրբեջանի միջև ստորագրված համաձայնագիրը ոչ միայն առաջընթաց է քաղաքական կայունության հասնելու գործում, այլև տնտեսական հարաբերությունների նոր դարաշրջան։ Նրա կարծիքով, Թրամի երթուղու (Զանգեզուրի միջանցք) նախագծի մեկնարկով Հարավային Կովկասը կդառնա ավելի ինտեգրված, քան նախկինում։
 
Իր հերթին, ԱՄՆ պետքարտուղարի տեղակալի ավագ խորհրդական Քալեբ Օրը հայտարարել է, որ Կասպից ծովի տարածաշրջանը, լայն իմաստով, որը ներառում է Հարավային Կովկասը և Կենտրոնական Ասիան, զգայուն տարածք է ԱՄՆ քաղաքական ռազմավարության համար։ Նրա խոսքով՝ այս տարածաշրջանը կարևոր ռազմավարական հետաքրքրություն է ներկայացնում Միացյալ Նահանգների համար՝ ներդրումների և զարգացման համար։
 
Այնուհետև, Ադրբեջանի Հանրապետության նախագահի օգնական և նախագահի աշխատակազմի արտաքին քաղաքականության  բաժնի ղեկավար Հիքմաթ Հաջիևը ընթերցել է՝ նախագահ Իլհամ Ալիևի ուղերձը ֆորումի մասնակիցներին։